ЖИТЕЛИ НА ДЕБАР ВИДЕЛЕ МЕЧКА НА БУЛЕВАР: Oд Здружението на ловци „Стогово“ советуваат како да се заштитите при средба со нив

Добивај вести на Viber

Жители на Дебар во центарот на градот виделе мечка. 

Здружението на ловци „Стогово“ од Дебар предупредува на загрижувачка појава на диви животни како што се мечки, диви свињи, волци и лисици во градот и во населените места.

Дивите животни се приближуваат до населените места и влегуваат во нив. Оваа појава претставува зголемена опасност за жителите во руралните подрачја, но и во градот.

„Овој феномен најчесто се случува во есенскиот период, кога дивите животни, особено мечките бараат повеќе храна за да се подготват за зимата. Пред неколку дена, во доцните вечерни часови, граѓаните на Дебар се соочија со возрасна мечка на главниот булевар во градот, што претставуваше сериозна опасност“, наведуваат од Здружението.

Без намера да се создадат паника, но со цел да се заштитат граѓаните, од Здружението велат дека имаат обврска да дадат неколку важни совети како да се постапува во вакви ситуации.

„Останете смирени. Не правете брзи движења и не трчајте, повлекувајте се полека наназад, без да му го свртите грбот на животното, зборувајте со тивок и со смирен глас, за мечката да разбере дека сте човек. Не ја гледајте директно во очи – тоа може да го сфати како провокација. Доколку е на поголемо растојание, направете мала бучава (плеснете со раце, зборувајте со нормален тон) за да се оддалечи. Ако е блиску и сè уште не ве забележала, останете мирни додека не се оддалечи. Веднаш известете ја полицијата, шумската служба или општината“, советуваат од Здружението.

Има и совети што не треба да се прави: Не трчајте – мечката е многу побрза од човекот, не викајте и не ја провоцирајте, не ѝ приоѓајте за фотографии или за видеа, никогаш не ја хранете – ќе се навикне да се враќа повторно, не ја следете во шумата, не оставајте храна надвор од домот или објектите.

foto freepik.com