Зошто Никола Тодоров бара да го повикаат на состанок во ОК Карпош?
Објавено во: Македонија 24 Октомври, 2018
Никола Тодоров, екс министерот од редовите на ВМРО-ДПМНЕ бара да го сослушаат од партијата.
За него пред два дена партијата побара да биде исклучен, и тој сака да биде повикан на состанок во матичниот општинскиот комитет во Карпош. Бара средба за да ги каже своите факти и докази.
Тодоров на Фејсбук му пиша на претседателот на ОК Карпош и вели дека има право, а претседателот на ОК има обврска да го повика.
„Ако барем малку верувате во четирите свети букви. ВМРО е Демократска Партија за Македонско Национално Единство. Демократска! Ако е така, не само што јас имам право на тоа, туку вие имате обврска. Имате обврска да ме ислушате, да ми ги предочите вашите факти и докази, но и да ги слушнете моите. Ова е темелно начело на правдата и еднаквоста и немате никакво право да ми го ускратите тоа. Затоа барам да ме повикате на состанокот на ОК, да ми ги презентирате фактите и доказите против мене, да ги слушнете мојте аргументи, и потоа да ја донесете одлуката“, пишува Тодоров.
Барањето Тодоров го упатува јавно, затоа што вели дека верува, во како што пишува, „демократските принципи на кои се темели неговата партија“.
Екс министерот вели дека ова правило постоело и се применувало и во комунизмот, освен во случаи кога станувало збор за „политички ликвидации и политички монтирани случаи“. Според него, лошо е што ова се применува и денес. Тодоров очекува позитивен одговор.
На последната седница на Централниот комитет на ВМРО-ДПМНЕ во неделата се дадени насоки да биде исклучен од партијата. Од партијата образложија дека се прочистуваат и ќе расчистат со хипотеките од минатото.