„АФЕРА ЛУКСУЗЕН МЕРЦЕДЕС“: Груевски ќе бара одложување на одењето в затвор

Добивај вести на Viber

Во петок екс премиерот Никола Груевски ја доби поканата согласно која ќе треба на „Митровден“ односно на 8 Ноември да се јави во затворот Шутка на издржување двегодишна казна затвор.

Телма објави дека поранешниот лидер на ВМРО ДПМНЕ денеска преку својот адвокатски тим и официјално ќе побара одложување на двегодишната затворска казна на која е осуден поради случајот набавнка на луксузен „мерцедес“ или во јавноста случај познат како „Тенк“.

Се наведува дека информацијата ја потврдиле и адвокатите на Груевски, кои не сакале да прецизираат врз основа на што ќе биде побарано одложување.

Одбраната, наводно рекла дека одложување на казната затвор ќе биде побарано поради неодложени обврски на Груевски кои произлегуваат од неговата работна позиција и функција која ја извршува како пратеник на македонското Собрание.

Законите пак, дозволуваат одложување на затворска казна во осум случаи, меѓу кои се и здравствено-медицински, семејни и деловни причини, а можноста за одложување е најдолго до година дена.

Во затворот во Шуто Оризари Никола Груевски ќе треба да отслужи двегодишна затворска казна врз основа на спорната набавка на луксузниот „мерцедес“ за што СЈО го обвини во случајот „Тенк“ и за кој се востанови дека блиндираното возило е платено 600 000 евра.