АФРИКА НЕ Е ЃУБРИШТЕ: Франција сака да го забрани извозот на користена облека
Објавено во: Свет 14 Март, 2024
Французите не сакаат користената облека да завршува во Африка поради загадувањето. Она што нема да се продаде, завршува на депониите.
Франција предлага да се воведе забрана за извоз на користена облека во Европската унија(ЕУ) затоа што предизвикува загадување во земјите увозници, потврди денеска Министерството за заштита на животната средина, во време кога европските влади се обидуваат да најдат решение за растечкиот проблем со текстилниот отпад.
Според ОН, извозот на користен текстил од ЕУ во 2022 година достигна 1,4 милиони метрички тони. Тоа е повеќе од двојно во споредба со 2000 година.
Европската комисија(ЕК) соопшти дека ЕУ годишно произведува 5,2 милиони тони отпад од облека и обувки.
Предлогот на Франција го поддржуваат Шведска и Данска, а за него ќе се расправа на состанокот на Советот за животна средина во Брисел на 25 март. Франција е критична кон т.н брза мода и прекумерен консумеризам.
Во 2019 година, ЕУ извезла 41 отсто од искористениот текстил во Азија, каде што бил сортиран и преработен во централните точки. Поголемиот дел од него се користел во индустријата или бил испратен во други азиски земји за рециклирање и во Африка каде што бил повторно пуштен во употреба. Речиси половина од искористениот текстил завршил во африканските земји.