Американски крајнодесничарски екстремисти планираат напади со дронови?

Добивај вести на Viber

Американски крајнодесничарски екстремисти отворено разговараат за употреба на своерачно изработени дронови како стратешко оружје во потенцијална „втора граѓанска војна“ против владата на САД, објави британскиот весник „Гардијан“.

Според експерти, инспирирани од современите војни, екстремистите гледаат на дроновите со функција за набљудување во реално време (FPV дронови) како клучно средство за напади.

Во јавни и доверливи онлајн простори, овие групи дискутираат како евтините дронови ја револуционизираат војната и би можеле да бидат употребени во идни конфликти. Примери за ваква употреба доаѓаат од војната меѓу Русија и Украина, терористичките групи како „Исламска држава“ и нарко-картелите.

Џошуа Фишер-Бирч, аналитичар кој речиси една деценија ги следи крајнодесничарските екстремисти, посочи на случај со неонацист од Нешвил кој планирал да бомбардира електрана со дрон, но бил спречен од полицијата. Тој додаде дека екстремистите учат од начинот на кој криминалните групи ги користат дроновите како „мултипликатор на сила“ против владините сили.

„Гардијан“ наведува дека ФБИ изразува сериозна загриженост за неонацистички секти и други насилни крајнодесничарски групи кои размислуваат за употреба на FPV дронови за напади во САД. Екстремистите регрутираат лица со воена обука за да ги пренесат своите вештини, а војната со дронови се смета за стратешки важна техника.

ФБИ одби да коментира за „Гардијан“.