Ангелов: Со спинувањето за двојазичност ВМРО-ДПМНЕ прави огромна штета

Добивај вести на Viber

Стојанче Ангелов, лидерот на Достоинство ја искритикува власта предводена од ВМРО-ДПМНЕ за кревање на тензии во јавноста и влошување на меѓуетничките односи со спинувањето на изјавата на Заев поврзана со користење на албанскиот јазик, а исто така и го осуди излагањето на Зијаден Села кој побара федерализација.

– За каков соживот зборуваме доколку мнозинството Албанци бараат нивниот јазик да стане рамноправен и официјален јазик на целата територија на Македонија. Дали, доколку албанскиот јазик е официјален јазик на целата територија на Република Македонија ќе придонесе за подобрување на меѓуетничкиот соживот или за уште поголемо влошување на меѓуетничките тензии, посочи Ангелов. 

Тој исто така е загрижен доколку се инститира на јазична поделба тогаш односите меѓу Македонците и Албанците дополнително ќе се заладат.

- Доколку Албанците и Македонците престанат да се разбираат меѓу себе, а тоа ќе се случи доколку Албанците прекинат да го користат македонскиот јазик, ние уште повеќе ќе се оддалечиме. Од друга страна, зошто тие би биле привилегирани во однос на Србите, Турците, Ромите и другите етнички групи кои што живеат во Република Македонија. Дали Албанците кои што живеат во Швајцарија, Германија или Франција имаат право да го користат нивниот јазик и дали тоа штетно се одразува на нивното живеење во тие држави, рече Ангелов.