Антикорупциска проверува дали Рашковски добил „доџ вајпер“ од 50.000 евра за награда
Објавено во: Македонија 28 Декември, 2021
Гостиварска фирма која градела објекти што се сопственост на државата за десеткратно помала цена продала возило за 5.000 евра на владиниот советник Игор Христов, а тој потоа го подарил на сопругата на Рашковски.
Во анкетниот лист на Рашковски стои дека возило марка „доџ вајпер“, произведен 2005 година во вредност од 300 илјади денари или околу пет илјади евра, е во сопственост на неговата сопруга.
И од МВР потврдиле за Антикорупциска дека имало две промени на сопствеништво на автомобилот, но во договорот стои нереална цена, бидејќи оваа марка дури и како половно возило би вредело најмалку 50.000 евра.
– Од наведеното произлегува дека блиско лице на Рашковски, добила на подарок од Игор Христов возило што вреди околу 50 илјади евра, кое истото го купил за невообичаено ниска цена од гостиварската фирма, која пак имала поднесено барање за спроведување постапка за склучување пред договор за пренесување на правата за градење објекти што се сопственост на државата, доставено до Владата. Тоа води кон сомневање за преземање дејствија спротивни на закон. По извршената проверка откриено е дека на 17.12.2018 година до Генералниот секретаријат на Влада, гостиварскат фирма доставила барање за спроведување постапака за склучување пред договорот. Во барањето се известува за имот за катастарска Општина Гостивар во вкупна површина од 366 квадратни метри деловен простор, имот сопственост на државата, а со право на користење на УЈП во Гостивар и Централниот регистар – изјави Горан Трпеноски, членот на ДКСК на денешната седница.
Објектот што се споменува во овој случај во Гостивар, според Трпеноски, најверојатно е влезен и во стечајната маса на пропаѓањето на Евростандард банка и Здружението на оштетени штедачи реагирале за овој случај.