АВСТРАЛИЕЦОТ СО МАКЕДОНСКИ КОРЕНИ ЏИМ РИСТЕВСКИ ИМА ГОЛЕМО СРЦЕ - трет пат помага, сега собра 28 илјади долари за малиот Јаков

Добивај вести на Viber

Хуманоста некогаш доаѓа и од далеку, но сепак, од човек со наши корени. 

Џим Ристевски, австралијанец со македонски корени, за неполни два дена успеал да собере преку неговата мрежа на деловни партнери и пријатели приближно 28.000 австралиски долари, за хемотерапија за двегодишниот Јаков.

Како што објавија дел од медиумите, познатиот бизнисмен и филантроп по трет пат со своја иницијатива успеал да ја вклучи заедницата во Австралија за помош, и тоа за земјата од каде што потекнуваат неговите предци.

„Јаков, ти си мал борец, твојата насмевка ги стопи срцата на Австралијците. Тука, кога сме повторно во локдаун, сите ги отворивме нашите џебови за да помогнеме. Инаку сум татко на три деца и едноставно не можев да замислам да не се вклучам да помогнам“, вели Ристевски кој ѝ е познат на македонската јавност по два претходни хумани гестови.

Во 2016 година, кога се случија големите поплави тој успеа да собере 10.000 австралиски долари  за малиот Ведран Велиновски од Крива Паланка, кој ги загуби своите мајка и брат на скопската обиколница.

Минатата година тој повторно се јави како организатор на иницијатива за собирање донации во која ја вклучи неговата ќерка Медисон Ристевски, средношколка од Волонгонг, Австралија. Таа ѝ припаѓа на четврта генерација Австралијци со македонско потекло и изработувајќи средношколски проект, ги заинтригира светот и нашата дијаспора. Донациите доаѓаа од хумани луѓе од Австралија, Кина, Филипините, Нов Зеланд, Малта, Канада, САД. А беа наменети за реконструкција на Медицинското училиште Д-р Јован Калаузи од Битола, кое беше во очајна состојба.