„Азербејџан ерлајнс“ објави детали од прелиминарната истрага за падот на авионот и која била ПРИЧИНА ЗА КАТАСТРОФАТА

Добивај вести на Viber

Азербејџан ерлајнс, превозникот на патничкиот авион што се урна во средата во Казахстан, соопшти дека прелиминарната истрага открила дека катастрофата се случила „како резултат на физичко и техничко надворешно мешање“.

Американски официјален претставник изјави за Си-Ен-Ен во четвртокот дека првичните индикации се дека руски противвоздушен систем можеби го соборил патничкиот авион.

Русија во петокот соопшти дека патничкиот авион бил пренасочен од првобитната дестинација во Грозни, Чеченија, поради украинските беспилотни летала во областа, како и поради маглата.

- Додека летот Ј2-8243 се обидуваше да слета во јужната руска република, украинските борбени беспилотни летала извршија терористички напади врз цивилната инфраструктура во градовите Грозни и Владикавказ - изјави Дмитриј Јадров, шеф на руската Федерална агенција за воздушен транспорт.

Пилотот на авионот двапати се обидел да слета во Грозни, изјави Јадров, но не успеал. Му беше понудено да слета на други аеродроми, продолжи рускиот функционер, но пилотот „одлучи да продолжи кон аеродромот Актау“ преку Каспиското Море во Казахстан, исто така, имаше густа магла во областа на аеродромот во Грозни.

Поради ова, рече Јадров, небото во таа област било затворено, што значело дека авионите во околината морале веднаш да го напуштат воздушниот простор.

Азербејџанскиот авион, кој летал од Баку за Грозни, се урна во средата наутро во близина на градот Актау во западен Казахстан, при што загинаа 38 лица од вкупно 67 членови на екипажот и патници во авионот.

Ројтерс и Еуроњуз објавија во четвртокот, повикувајќи се на извори, дека првите прелиминарни резултати од истрагата на Азербејџан покажале дека руската противвоздушна одбрана го соборила авионот во близина на Актау.