Банк експо: Денарот во банките е рамо до рамо со Еврото

Добивај вести на Viber

Трета година по ред учеството на денарското штедење расте, од 35 отсто во 2009 на 48 проценти во 2012 година што покажува дека македонските граѓани имаат доверба во банките и во домашната валута.  Вкупните влогови изнесуваат 171 милијарда денари, беше речено на денешниот форум „БанкЕкспо“ организиран по повод Светскиот ден на штедењето. Гувернерот Димитар Богов изјави дека македонските граѓани имаат доверба во банките. Штедењето на населението продолжува да расте. Годинава бележи зголемување од 9,2 отсто во однос на лани. - Нашиот банкарски систем е стабилен, нема поголеми проблеми, адекватноста на капиталот е на исклучително високо ниво од 17 отсто, а ликвидноста се држи на историско ниво од околу 30 отсто од вкупната актива. Тоа гарантира стабилен банкарски систем и можност банките да ја поддржуваат домашната економија – вели Богов. Министерот за финансии Зоран Ставрески вели дека интересот за штедење во денари е засилен и е зголемен интересот за подолгорочно штедење. Ѓорѓи Јанчевски, претседател на Здружението на банкарството при Стопанската комора на Македонија, директор на НЛБ Тутунска банкав, вели дека депозитите од почетокот на 2012 се зголемени за 5 отсто или за 140 милиони евра и покрај кризата која годинава има поголем замав. - Тоа укажува дека политиката на одржување стабилен курс на денарот, стабилни цени, ниска инфлација и фискална дисциплина, ги даваат потребните резултати, подвлече Јанчевски. На БанкЕкспо што првпат се организира во Македонија учествуваат претставници од сите релевантни креатори на бизнис-климата, банки, комори, стопанственици и експерти. Во тек е дебатата за влијанието на актуелната криза. Се очекува да бидат изнесени или понудени конкретни предлози и решенија за нејзино евентуално ублажување. Пред почетокот им беа доделени признанија на најдобрите шалтерски работници годинава.