Бројот на милионери расте, еве што ќе се случи за 5 години!

Добивај вести на Viber

Светската економија не е во најдобра состојба во последниве години, но бројот на супер богатите продолжува да се зголемува, се вели во извештајот за светското богатство на „The Financialist“, дигиталното списание за бизнис и економија на „Credit Suisse“. Од „Credit Suisse“ очекуваат во САД до 2017 година да има приближно 17 милиони милионери, додека нивниот број во Европа да биде околу 15 милиони. Пазарите во развој веројатно ќе имаат поголем удел од бројот на милионери во светот во следните години, а бројот на богатите луѓе веќе се зголемува и тоа многу забрзано во земјите како Кина и Бразил. До 2017 година Кина ќе има 1 901 000 милионери, според „Credit Suisse“. Ова ќе претставува раст од 97%, во споредба со сегашната бројка од 964 000. Бројот на милионерите во Бразил, пак, ќе се зголеми за 119% во следните пет години или до 497 илјади. Во моментов нивниот број е 227 илјади. Раст од над 100% во бројот на милионерите до 2017 година ќе има и во Русија и Малезија. Милионерите во Русија ќе пораснат за 109% до 203 илјади , во споредба со 97 000 во 2012 година. Растот пак во Малезија, каде што во моментов има 36 000 милионери, според проценките ќе расте за 108% до 75 000. Бројот на милионерите во Мексико, од каде е и најбогатиот човек на светот Карлос Слим, се очекува да достигне 253 000, или со 79% повеќе во споредба со оваа година. За истиот период бројот на  милионерите во Колумбија и Чиле ќе бележи раст од 39% и 48% - до 64 000 и 62 000. Турција ќе може да се пофали со 144 000 милионери, по пет години, или со 71% повеќе од сега, додека милионерите во Индија ќе се зголемат за 53% до 242 000. Растот на бројот на милионери во Арапскиот свет ќе биде скромен, прогнозираат од „Credit Suisse“. Нивниот број во Саудиска Арабија се очекува да се зголеми за 17% до 54 000 во 2017 година, додека милионерите во Обединетите Арапски Емирати ќе бидат 48 000, или за 12% повеќе од сега.