ЦЕНТАР ЖУПА ПОВТОРНО БЕЗ ЦЕНЗУС ЗА ИЗБОРИТЕ - и во минатото недостигаа гласови

Добивај вести на Viber

Во Општина Центар Жупа не е обезбеден потребниот цензус од 1/3 од вкупното гласачко тело кое изнесува 7.551 лице, кажа Неџип Илјаз, претседател на Општинската изборна комисија. 

Во оваа општина во трка за градоначалник беа тројца кандидати, Аријан Ибраим од Демократската партија на Турците, поддржан од ВМРО-ДПМНЕ, кој се бореше за четврт мандат. Потоа Алил Емрула од Движење за национално единство на Турците и Инает Баки од Партијата за движење на Турците. 

Овие три партии, како и ВМРО-ДПМНЕ и СДСМ имаа кандидатски листи за девет члена на општинскиот совет. 

И на претходните избори во Општина Центар Жупа во двата круга на гласање не беше обезбеден потребниот цензус од 1/3 од вкупното гласачко тело. 

Владата потоа го наименува за повереник за вршење на работите од надлежност на градоначалник, актуелниот Аријан Ибраим. 

Тој на повторените избори на 17 април следната година, кога имаше еден противкандидат, доби околу 80 отсто од гласовите, но поради необезбеден цензус истите беа повторени на 20 август, кога другиот кандидат се повлече, па Ибраим, го обезбеди третиот последователен мандат со над 80 отсто од гласовите. 

Во оваа печалбарска општина во Единствениот избирачки список се 7.551 лице, а според пописот во неа живеат 3.720 жители.