ДАЛЕКУ СЕ СЛУШНА ЗА „МЕДЕНА ЗЕМЈА“: Оскар нема, но Македонија доби добра реклама

Добивај вести на Viber

Иако македонскиот документарен филм „Медена земја“ не доби Оскар, сепак придонесе добри вести за нашата земја да одекнат во светот.

Многу луѓе од регионот и пошироко, навиваа за „Медена земја“, и ја сфатијата пораката на хероината Атиџе Муратова. Македонија се испромовира со помош на филмот. Крсте Блажески од ХОТАМ вели дека секако овој филм ќе му покаже на светот, дека во Македонија има што да се истражува.

„Тоа секако ќе биде позитивно, и ќе придонесе за освојување на нови пазари, и кога ќе почнат туристичките саеми, ќе го потенцираме филмот, да видат дека Македонија е земја каде има што да се види, да се истражува. Филмот секако ќе има маркетиншко влијание“, вели Блажески.

Од Здружението на туристички водичи на Македонија објаснуваат дека одредени придобивки секако ќе има, откако филмот стана познат за поширок аудиториум.

„Можно е луѓето од странство да покажат интерес да го посетат баш тој регион каде е снимен филмот, зошто да не? Сепак тоа е една убава приказна“, додаваат оттаму.

Јустина Млецзак, туристички водич од Полска објаснува дека филмот за неа е неверојатен и честита на целата екипа. За неа „Медена земја“ е една убава, но тешка приказна.

„Значи, според мое мислење тоа е единствената лекција за сите нас, исто така, за туризмот или медиумските работници, дека треба да бидеме внимателни да ги заштитиме ваквите места, таквите луѓе, традиции, затоа што тие навистина можат брзо да станат празен туристички производ. Јас би сакал да им честитам на филмската екипа - тие создаваат неверојатно важна слика. И тоа е моќта во овој филм“, додава водичот.

Производителите на мед изјавија дека филмот го промовирал македонскиот мед, и се надеваат дека тој ќе биде баран надвор од нашите граници.

„Медена земја“  не освои златна статуетка, но освои милиони срца ширум светот.  

За најдобар интернационален филм, Оскарот го доби јужнокорејскиот „Паразит“.