Донација за еднаква вклученост во информатичкото општество на лицата со попреченост

Добивај вести на Viber

Фондацијата е-Македонија во партнерство со граѓанската организација „Отворете ги прозорците“ стартуваа со проектот „Компјутерот - прозорец кон светот“ за еднаква вклученост во информатичкото општество на децата и лицата со  попреченост. Целта е да се овозможи што повеќе лица со попреченост да користат компјутер и интернет. Лицата со попреченост не можат да користат стандарна компјутерска опрема, која наместо да помогне, ја отежнува нивната активна вклученост и негативно влијае на нивниот понатамошен успех во сите сфери на живеењето. Затоа, првиот чекор беше набавка на асистивни и смарт уреди, во износ од 14.000 евра, како донација од Фондацијата е-Македонија. „Како лидер во светот на телекомуникациите, ние се движиме кон создавање на  дигитално општество, кое не би било целосно доколку децата и лицата со попреченост не се дел од него. Наша обврска е како социјално одговорна компанија да им овозможиме еднакви услови, да им дадеме поттик да бидат активно вклучени рамноправни членови на   новото општество базиранo на интернет протокол и информатичко – комуникациски технологии“ – изјави Радмила Јонческа, претседател на Фондацијата е-Македонија. Опремата е наменета за „Отворете ги прозорците“, но и за уште две други организации -„Ластовица“ од Скопје и Здружението на лица со церебрална парализа од Велес. По добиената обука, и овие организации ќе можат да им помогнат на лицата со попреченост да ги користат компјутерите за сопствениот личен развој. „Современата технологија може секому да му го олесни и поедностави животот, да овозможи секој да го даде својот придонес во заедницата. Многу не радува дека ова убедување го споделуваме со Фондацијата е-Македонија. Поддршката ќе ја искористиме за да им помогнеме на лицата со попреченост да го развијат сиот свој потенцијал користејќи современа компјутерска опрема“  – изјави Владимир Лазовски, директор на „Отворете ги прозорците“. Фондацијата е-Македонија е основана во 2004 година, од Македонски Телеком, во чест на имплементација на идејата на починатиот претседател Борис Трајковски за ширење и поддршка на придобивките од информатичко општество и унапредување на знаењето. Целта на Фондацијата е создавање на инклузивно општество, односно да им овозможи на ранливите групи на граѓани да ги користат новите технологии и да бидат ефективно вклучени во дигиталното општество. Граѓанската организација „Отворете ги прозорците“ е единствена во Македонија и поширокиот регион што овозможува пристап на лицата со попреченост до информатичката технологија. Располага со Центар за асистивна технологија опремен со прилагоден хардвер и софтвер за деца и возрасни со попреченост. Се спроведуваат индивидуални програми за секој корисник, подготвени од тим од дефектолози и информатичар. Досега, над сто лица со интелектуална, физичка, комбинирана попреченост и сензорни оштетувања ги користеле бесплатните услуги на оваа организација.