„Државни патишта“ потврди: Исплатени 117 милиони евра за Бехтел и Енка

Добивај вести на Viber

Јавното претпријатие за државни патишта (ЈПДП) преку писмо до јавноста потврди дека е извршен првиот трансфер на сметката на изведувачот на автопатските делници од Коридор 8 и 10д, Бехтел и Енка, во висина од 7.254.000.000 денари или 117.000.000 евра од државниот буџет преку Министерството за транспорт и врски.

Од таму напоменуваат дека трансакцијата е извршена согласно Програмата за финансирање патна инфраструктура за проектот Коридор 8 и Коридор 10д за 2023 година, донесена на седница на Владата на Република Северна Македонија одржана на 23 март годинава, како и по нејзиното објавување во Службен весник, 

„Спред законските обврски од посебниот закон и потпишаниот Договор со изведувачот Конзорциумот Бехтел – Енка, како и согласно владината Програма, овие средства се наменети за мобилизација, екипирање со механизација, воспоставување кампови, лабораторија и други работи од страна на изведувачот на работите пред да се започне со градежни активности на трасите“ информираат од ЈПДП.

Од јавното претпријатие додаваат дека во следниот период, ќе се реализираат и подготвителните работи како што се снимањето на локации, подготовката на урбанистичките проекти, на основните проекти, чија цел е да започнат и постапките за експропријација и проектирање.