Џанго: Ќе ја држам Комората подалеку од политиката

Добивај вести на Viber

„Мојата првенствена заложба е да ги држам адвокатурата и Комората подалеку од политиката. Потоа, да се зајакне квалитетот на адвокатурата преку создавање на законски решенија во интерес на адвокатите и граѓаните, како и во однос на еднаквата положба на адвокатите во постапките. Во таа смисла, моја заложба ќе биде и адвокатите да учествуваат во подготовката на прописите бидејќи во таа насока од клучно значење се нивните мислења, предлози и сугестии како бранители на човековите права. Исто така, во работата на АКРМ акцентот ќе биде ставен и на континуираната едукација на адвокатите, како и  на меѓународната и регионалната соработка на АКРМ. Од големо значење во понатамошниот период е и да се обезбедат подобри услови за работата на Комората“, истакна новиот претседател на Адвокатската комора на РМ, , Љубомир Михајловски-Џанго во продолжението на 63-то годишно собрание во Струга.

Поранешниот претседател на Комората, Никола Додевски на новото раководство на Комората му посака успех, истрајност и одлучност во реализирањето на своите цели, а во насока на продолжување на историскиот континуитет на адвокатурата и улогата на адвокатите во општеството како вистински заштитници на човековите права.

Во рамките на 63-тото Годишно собрание, Никола Додевски за успешното раководење на Комората доби и признание од страна на Стручната служба на Комората, за која тој подвлече дека има значаен и единствен придонес  во работата на Комората.

Новите членови на Управниот одбор на АКРМ се (од лево кон десно): Стојан Прензоски, адвокат од Охрид, Владимир Стојкоски, адвокат од Струга, Живко Ајтов, адвокат од Кавадарци, Гордана Митовска, адвокат од Скопје, Александар Симјановски, адвокат од Тетово,  Бесим Реџепи, заменик-претседател на АКРМ и адвокат од Гостивар, Никола Главинче, адвокат од Битола, Љубомир Михајловски-Џанго, претседател на АКРМ и адвокат од Скопје, Жана Кузмановска, адвокат од Скопје, Ване Андреев, адвокат од  Струмица, Јелена Ристиќ, заменик-претседател на АКРМ и адвокат од Скопје, Стевче Глигоров, адвокат од  Скопје, Дарко Џорлев, адвокат од  Штип, Доне Кузмановски, адвокат од  Битола, Оливер Гашев, адвокат од Велес, Никола Петров, адвокат од Струмица и Димитар Панчевски, адвокат од Скопје.