Ексклузивно: Еуромакс ќе се жали, најавува и арбитража

Добивај вести на Viber

Канадската компанија Еуромакс Рисорсис ќе се жали до Управниот суд во земјава, откако беше одбиена нејзината жалба од второстепената Државна комисија за вадење руда од рудникот Иловица. Таа тврди дека има силен правен случај кој го оправдува поднесувањето жалба. Од компанијата, доколку ова не вроди плод, не исклучуваат и земјава да ја дадат пред меѓународна Арбитража.

Вакво известување компанијата Еуромкас Рисорсис испратила до своите акционери официјално преку Берзата во Канада. Во тој допис компанијата детално ги известува акционерите дека откако била информирана за одбивањето на нејзината жалба од второстепената комисија, има рок од 30 дена за тоа да се жали пред Уставниот суд.

„Еуромакс рисорсис доби известување од Министерството за економија на Република Северна Македонија дека Државната комисија за постапување по управни и постапки за вработување во втор степен (Државна комисија) ја отфрлила жалбата против Резолуцијата за одбивање на Министерството за економија, како што е наведено во соопштението на компанијата од 12 јули 2019 година. Известувањето се однесува на концесијата „Иловица 6“ на компанијата, и концесијата „Иловица 11“ останува непроменета“, се вели во известувањето од Еуромакс Рисорсис.

Од канадската компанија натаму нагласуваат дека имаат силен правен случај.

„Известувањето дозволува компанијата да ја обжали одлуката на Државната комисија во рок од 30 дена преку Управниот суд на Северна Македонија. Врз основа на силен правен случај, компанијата има намера да поднесе жалба. Другите правни начини, вклучително и меѓународната арбитража, остануваат отворени и истите ќе бидат прогонети соодветно“, ги информираат акционерите од Еуромакс Рисорсис.

Уште од компанијата наведуваат дека Еуромакс рисорсис со нетрпение очекува да ја реши ситуацијата со сите релевантни владини институции во согласност со минералите и административните закони на Северна Македонија.

„Еуромакс има главен развојен проект во Северна Македонија и е фокусиран на градење и раководење со проектот за бакар-злато Иловица-Штука“, нагласиле од компанијата до Берзата во Канада. 

А Владата, пак, како што од таму велат владини извори, дефинитивно ќе го раскине договорот за концесија со Еуромакс Рисорсис. Ова од причина што, како што велат, второстепената Државна комисија која ја одби жалбата на Канаѓаните, е последната инстанца која одлучуваше, по што Владата мора автоматски да ја прифати одлуката на Комисијата.

Подетално како ќе се одвива процедурата на еднострано раскинување на договорот со канадската компанија Еуромакс Рисорсис, денеска треба да образложи Министерството за економија. 

И додека екологистите слават, над земјава виси закана од тужба на милионска сума, која засега не се знае колкава ќе биде, но се претпоставува дека ќе тежи многу, бидејќи концесионерот во Иловица планираше инвестиција од 340 милиони евра.

( Н.Н.Ф.)