ЕКСКЛУЗИВНО: “Penthouse“ над Славија е роденденската желба на Субрата Рој!

Добивај вести на Viber

Фактор од неофицијални владини извори дознава дека Рој барал да се изгради застаклен, луксузен апартман на покривот од хотелот Славија, кој би требало да биде готов до јуни следната години. Индискиот бизнисмен Субрата Рој сакал роденденот догодина да го слави во “Penthouse”, неофицијално дознава Фактор од владини извори. Рој од своите, но и од македонските архитекти барал да издигнат уште 7 метри над денешната највисока точка на хотелот Славија кој индиецот го купи во Охрид и на покривот да се изгради застаклен, луксузен апартман кој би требало да биде готов до јуни следната година. Во Охрид ќе се пие шампањ во хелиумски балон?! Неофицијалните извори на Фактор од Владата, а блиски до индискиот бизнисмен објаснуваат дека Рој имал низа барања за тоа како сака да го реновира хотелот Славија. Покрај луксузните апартмани и градина на покривот од хотелот, Рој сакал да има надворешен застаклен базен кој ќе зафаќа неколку ката од хотелот. Од македонските архитекти најверојатно ќе се бара и луксузно уредена градина на покривот од хотелот, како и луксузно партерно уредување. Фактор исто така, дознава и дека се предвидува и пиење шампањ за 70-тина луѓе во воздух, во хелиумски балон. Во близина на хотелот Славија, Субрата Рој најави дека ќе гради марина, луксузен голф терен, конференциски сали, шопинг центри... За 5 милиони евра Рој ја купи Славија Како што ексклузивно објави Фактор во јануари годинава, помалку од 5 милиони евра плати индискиот бизнисмен Субрата Рој за хотелот Славија во Охрид. Сведоци на купопродажниот договор за Славија на Рој му биле и 20-члената индиска делегација, и министерот за финансии Зоран Ставрески и директорот на Дирекцијата за технолошко-индустриски развојни зони Виктор Мизо. Дека индиската компанија Сахара Индија Паривар на чело со Субрата Рој ја купи Славија, за Фактор веднаш потврди и тогашниот сопственик Владо Рувинов. “Точно, индискиот бизнисмен Субрата Рој стана сопственик на хотелот Славија. Можам да кажам дека четиримесечните последни преговори вродија со плод. Субрата Рој дефинитивно го купи хотелот со најубава локација на Охридското крајбрежје. Сакам да искажам огромна благодарност до премиерот Груевски, до министерот Ставрески и до директорот Мизо за се што до сега направија, што во земјава донесоа сериознен инвеститор како Субрата Рој. Со ова, но и со реализацијата на грандиозниот проект на Субрата Рој во Љубаништа мислам дека ќе се прероди и Охрид и Македонија“, изјави за Фактор Рувинов во јануари годинава. Рој го купи хотелот Славија каде што ќе се сместат архитектите и сите инженери кои веќе на големо се подготовуваат за реализација на проектот „Сахаријан Македонија“. Р.Ф.