ЕЦБ: Банките во Грција може да добијат клуч на врата од понеделник
Објавено во: Балкан, Економија 19 Јуни, 2015
Европската централна банка (ЕЦБ) не ја исклучува можноста грчките банки да останат затворени и во понеделник, пишува британскиот весник „Тајмс“.
Во оваа фаза финансиските институции во Грција „можат да бидат принудени“ да останат затворени и во понеделник, откако вчерашната средба на Еврогрупата заврши неуспешно, а грчките инвеститори се повлекуваат со големи суми во готовина.
За време на разговорите зад затворени врати, ЕЦБ истакнала дека „грчките банки може да бидат принудени да останат затворени во понеделник“.
Само од почетокот на оваа седмица до средата од грчките банки биле подигнати 2 милијарди евра.
Туристите кои патуваат во земјата се предупредени за потребата да имаат пари за итни случаи, се вели во написот на „Тајмс“.
Можноста за обезбедување на итна финансиска помош на Централната банка на Грција ќе биде разгледана од телеконференција, информира „Ројтерс“.
Учесниците на вториот во последните денови итен состанок за Грција ќе разговараат за можноста за обезбедување дополнителна ликвидност на грчките банки.