Евгениј Дајнов: Срамното вето e отровно за бугарското општество
Објавено во: Македонија 25 Мај, 2022
„Позицијата“ за македонското прашање е тумор што нѐ убива нас Бугарите, а не Македонците, во колумна пишува Евгениј Дајнов, бугарски политиколог, дипломец на Оксфорд и професор на Новиот бугарски универзитет.
Вели дека на луѓето им се крева косата на глава, бидејќи нивното однесување е однесување на диви балкански хорди од почетокот на 20 век.
„Кога бев мал, често слушав од возрасните околу мене дека нешто било „неразбирливо како Индија“ и „комплицирано како македонското прашање“. Оттогаш помина долго време и се покажа дека Индија не е толку тешка да се разбере. Но, другото прашање и понатаму е комплицирано, иако одамна не сум ја слушнал фразата „македонско прашање“. Можеби не сум го слушнал скоро овој израз, бидејќи прашањето е чисто бугарско некое време. Срамното вето (и последователната парламентарна „рамковна позиција“) наметната од ГЕРБ-ВМРО за Северна Македонија е отровно за бугарското општество и државност. Внесовме во јавното тело нова капсула, која продолжува да се распаѓа и да го шири својот отров во сите нас. Не знам зошто мнозинството бугарски политичари се жалат дека ЕУ не го разбирала „бугарскиот став“ за македонското прашање. Овие политичари или не разбираат ништо од политика, или лажат. Вистината е дека ЕУ целосно разбира сè – од првата секунда кога ветото падна како гром од ведро небо, откако само две години претходно Бугарија се прогласи за гарант за влез на Западен Балкан во ЕУ“, пишува тој.
Наведува дека според „рамковната позиција“, Бугарите бараат од Македонците да се сменат имињата на неколку стотици улици; да тргнат некои спомен плочи, да признаат дека биле Бугари до 1944 година кога Македонците ги создале југословенските комунисти; да извршат лустрација (која самата Бугарија не ја спроведе), а таму каде што во пишани документи се споменува „македонски јазик“ да објаснат дека тоа е дијалект на бугарскиот јазик.
Tекстот е објавен во бугарскиот весник „Дневник“
фото Бгнес