ЕВРОПЕЈЦИТЕ СЕ ИЗЛОЖЕНИ НА ОПАСНА СУПСТАНЦИЈА: Хемикалијата предизвикува неплодност и алергиски реакции на кожата

Добивај вести на Viber

Европејците се уште се изложени на прекумерни количини бисфенол А, штетна хемикалија позната како БПА, која со децении се користи во производството на одредени пластични производи, објави Европската агенција за животна средина кон крајот на минатата недела. Агенцијата на ЕУ соопшти дека примероците од урина собрани од Европејци во неколку земји откриле дека изложеноста на БПА останува „повисоко над прифатливото ниво на здравствена безбедност“ и претставува потенцијален ризик за милиони луѓе.

Се користи во пластични и метални садови, шишиња со вода...

БПА е синтетичка хемикалија која широко се користи во пластични и метални контејнери за храна, шишиња со вода за повеќекратна употреба и цевки за вода за пиење. Дури и во мали дози, хемикалијата може да го ослаби имунолошкиот систем, велат од агенцијата. Други здравствени проблеми што може да ги предизвика БПА вклучуваат неплодност и алергиски реакции на кожата.

Бисфенол А и два други бисфеноли кои се користат како замена за БПА беа измерени во урината на 2.756 возрасни лица од 11 земји: Хрватска, Чешка, Данска, Франција, Финска, Германија, Исланд, Луксембург, Полска, Португалија и Швајцарија.

„Многу пораспространет здравствен ризик отколку што се мислеше“

„Нивото на пречекорување варира помеѓу 71 и 100 отсто“, велат од ЕЕА со седиште во Копенхаген за 11-те земји. „Благодарение на револуционерниот истражувачки проект на ЕУ за човечки биомониторинг, можеме да видиме дека бисфенол А претставува многу пораширен ризик за нашето здравје отколку што се мислеше“, рече извршната директорка на ЕЕА, Леена Ила-Мононен.

„Мораме сериозно да ги сфатиме резултатите од ова истражување и да преземеме повеќе активности на ниво на ЕУ за да ја ограничиме изложеноста на хемикалии кои претставуваат ризик за здравјето на Европејците“, додаде таа.

БПА е забранета во пластични шишиња и пакувања кои содржат храна за бебиња и мали деца во ЕУ со години. Во февруари 2018 година, блокот, исто така, воведе построги ограничувања на БПА во сите материјали што се во контакт со храна.