Европски експерти ќе не советуваат како да го планираме буџетот

Добивај вести на Viber

Две години преку твининг проект норвешки и холандски експерти ќе ги обучуваат административците од министерството за финансии како да ги кројат буџетските пари. Почетокот на овој проект денеска го означија министерот за финансии Зоран Ставрески, евроамбасадорот Аиво Орав и амбасадорот на Финска во Македонија, Јуха Отман. Со пари од Европската унија ќе се даде поддршка на министерството за подобрување на вештините за економски анализи и економски предвидувања. Проектот ќе чини еден милион евра, а активностите предвидени со проектот ќе придонесат за исполнување на економските критериуми и условите од поглавјето 17, кои се услови за процесот за пристапување. „Овој проект треба да овозможи размена на информации за економските политики и прогнози со цел да создаде покохерентна макроекономска рамка. Економската криза наметна потреба од поефикасни механизми за водење на економски политики. Оваа помош за министерството за финансии е биде во насока на создавање одржлива економска политика и економски раст, создавање на работни места и зголемување на конкурентноста“ изјави Аиво Орав. „Ова е силен мотив и патоказ за реформите на владата.Овој проект е значаен за зајакнување на капацитетите на министерството за финансии, за мерките и активностите за зголемување на економскиот потенцијал и за зајакнување на економскиот раст“ изјави Зоран Ставрески, министер за финансии