ФАКТОР НА ДЕНОТ: По повлекувањето на противкандидатите од Могила и Македонски Брод, Мицкоски очекува дека ќе имаат 59 градоначалници

Добивај вести на Viber

МИЦКОСКИ ОЧЕКУВА ДЕКА ВМРО-ДПМНЕ ЌЕ ИМА 59 ГРАДОНАЧАЛНИЦИ

Резултатите од првиот круг на локалните избори јасно покажуваат дека граѓаните го избрале ВМРО-ДПМНЕ и коалицијата како своја опција, порача денеска претседателот на ВМРО-ДПМНЕ, Христијан Мицкоски, во општина Лозово во рамки на изборната кампања, повикувајќи ги граѓаните за поддршка во вториот круг од локалните избори.

-Очекувам дека на крајот од овие избори, ВМРО-ДПМНЕ и Коалицијата ќе имаат 59 градоначалници, рече тој, додавајќи дека во 58 општини коалицијата победила и на советничките листи, обезбедувајќи мнозинство во советите, пренесе МИА.

Нема да ги повикувам граѓаните да гласаат за еден или за друг кандидат, бидејќи секој граѓанин си е здраворазумен, има право на гласање и има одговорност кому ќе го даде својот глас, изјави кандидатката за градоначалничка на Општина Центар, Билјана Ивановска. 

Таа во првиот круг од локалните избори освои 4.465 гласа.

ПОЧНУВА ЗИМСКОТО СМЕТАЊЕ НА ВРЕМЕТО

Ноќеска почнува зимското сметање на времето.

Стрелките на часовникот ќе се поместат еден час наназад, односно времето во 03:00 часот ќе се смета како 02:00 часот.

Промена на времето во Maкедонија е врз основа на годишната практика за регулирање на сметањето на времето и има за цел усогласување со европската регулатива во оваа област.

ОД ВЛЕН ВЕЛАТ ДЕКА АЛИ АХМЕТИ СТАВИЛ КАТАНЕЦ НА НАИ

Од ВЛЕН велат дека со својот речник, Али Ахмети стави катанец на НАИ. 

„Шокирани, но не и изненадени, го слушнавме Али Ахмети како повторно избувнува со банален, навредлив и недостоен јазик за човек кој некогаш тврдеше дека ги претставува Албанците. Од „загарите” до „газиместан”, овој срамен јазик е најјасен доказ за губењето на контролата, паниката и политичкиот крај на човек кој 20 години го третираше својот народ како приватна сопственост. Ахмети денес повеќе не зборува како политички лидер, туку како некој што се дави во сопствениот јазик на омраза. Кога човек кој водеше две децении го нарекува својот народ „Газиместан” и го навредува со „700 илјади мајки”, тогаш секој Албанец разбира дека овој човек повеќе не претставува никого, освен себеси и неговиот привилегиран круг“, велат од ВЛЕН. 

фото Фејсбук/Христијан Мицкоски