Герасимовски: Парите за проекти од унгарскиот кредит ќе ги земат и „опозициски“ градоначалници, но и претходната влада ги помагаше општините
Објавено во: Македонија 26 Октомври, 2024
Градоначалникот на Центар, Горан Герасимовски, во емисијата „Стадион“ на Канал 77 рече дека иако опозицијата била против унгарскиот кредит од 500 милиони евра, градоначалниците кои доаѓаат од редовите на СДСМ добиле пари за проекти од истото задолжување бидејќи тоа е легитимно.
Според Герасимовски и претходната власт ги помагала општините со бришење на долговите и со распределување на средства од „ТАВ програмата“.
- И претходната власт финансираше проекти на почетокот од 2024 и дел од парите добија градоначалниците на ВМРО-ДПМНЕ. Во минатото секоја влада наоѓала начин да финансира одредени проекти и да даде одредени повици до локалните самоуправи. Не навлегувам во начинот на кој е земен унгарскиот кредит. Мојата функција како градоначалник е менаџерска и барањата на граѓаните не се од каде е земен кредитот туку колку од барањата се реализирани, рече Герасимовски.
Според градоначалникот од Центар, најмногу средства треба да добиваат оние општини кои најдобро се менаџираат.