ГЛОБАЛНАТА ЖЕД ЗА НАФТА ЌЕ РАСТЕ НАЈМАЛКУ ДО 2034 ГОДИНА: Еве ги предвидувањата на Голдман Сакс

Добивај вести на Viber

Глобалната побарувачка за нафта ќе расте најмалку до 2034 година, покажуваат најновите прогнози на аналитичарите на њујоршката банкарска корпорација Голдман Сакс.

Во прогнозата се наведува дека побарувачката на нафта ќе се зголеми на 108,5 милиони барели дневно во 2030 година и ќе достигне врв во 2034 година кога ќе изнесува 110 милиони барели дневно, пренесува Ројтерс. Голдман Сакс наведува дека побарувачката за нафта ќе биде висока до 2040 година.

Покрај тоа, корпорацијата со седиште во Њујорк рече дека продажбата на електрични возила со батерии (BEV) забавува на глобално ниво, додека интересот за хибридите (HEVs) и plug-in хибридите (PHEV) е посилен од очекуваното.

Европската асоцијација на производители на автомобили (ACEA) на 22 мај објави дека бројот на регистрирани електрични возила со батерии во април се зголемил за 14,8 отсто на годишно ниво на 108.552 автомобили, додека пазарниот удел на тие возила остана стабилен на околу 12 отсто.

Во исто време, уделот на хибридно-електричните возила (HEV) значително се зголеми на годишно ниво, достигнувајќи 24,9 проценти во април 2023 година. Некои компании веќе најавија дека во иднина повеќе ќе се фокусираат на производство на хибриди наместо на целосно електрични возила на батерии, пренесува Танјуг.