Грција даде дозвола, Македонија се зачлени
Објавено во: Македонија 24 Мај, 2018
Република Македонија и формално стана полноправна членка на Јадранско – јонската иницијатива на состанокот на Советот на министрите за надворешни работи на оваа иницијатива што се одржа денеска во Катања, Сицилија, откако Грција го одобри истото по низата поволни чекори што ги направи македонската влада за да ги подобри односите со јужниот сосед.
Министерството за надворешни работи правеше повеќегодишни напори Република Македонија да стане членка на оваа унија на регионална соработка, но Грција преку своето влијание го блокираше приемот.
Делегација од македонското МНР предводена од Државниот секретар Виктор Димовски, учествуваше на состанок на покана на министерот за надворешни работи на Италија, Анџелино Алфано, во улога на земја претседавач на Јадранско-Јонската иницијатива.
– Поаѓајќи од овие определби новата влада, паралелно со крупните реформски чекори на внатрешен план, презеде интензивни активности за унапредување на односите и соработката со земјите од непосредното соседство, но и во пошироки регионални рамки. Со членството во Јадранско-Јонската иницијатива, Република Македонија ќе може заедно со останатите земји членки да го даде својот придонес во градењето солидни основи за процесот на европска интеграција, преку активниот придонес во приоритетните области во рамките на оваа иницијатива, како транспортот, туризмот, културата и животната средина, истака Димовски, се наведува во соопштението.
Јадранско-Јонската иницијатива е оформена во 2000 година со цел да го подобри развојот и зајакне безбедноста на земјите во регионот, да ја зајакне соработката помеѓу земјите-членки и да им даде поттик во процесот на интеграција со ЕУ. Во неа членуваат Италија, Грција, Словенија, Хрватска, Босна и Херцеговина, Србија, Црна Гора и Албанија, а од денека и Република Македонија.