Добивај вести на Viber
За денеска во 11 часот е закажана владина седница на која ќе се одлучува што понатаму, откако вчера ескалираше трговската војна со Косово.
Косово и Македонија вчера не постигнаа договор за укинување на ембаргото за македонските производи, воведено од косовските власти и за укинување на патните такси за косовските државјани воведени од македонските власти.
Вчера средбата на министрите Ваљон Сaраќини и Мимоза Кусари – остана без конкретен договор. Двајцата министри најавија дека преговорите ќе продолжат во наредните денови.
„Косовската влада е подготвена кога Република Македонија ќе ја повлече мерката за условен увоз на брашно, како и мерката за патни такси за косовските државјани, веднаш да го запре ембагорото за увоз на стоки од Македоднија – изјави министерката Кусари.
Синоќа до доцна во ноќта македонските транспортери во знак на протест го блокираа граничниот премин. Револтирани беа и косовските државјани за кои беше нејасно, зошто тие би требало да плаќаат за влез во Македонија.
Трговската војна меѓу Македонија и Косово го вклучи алармот и во Брисел. Како што јавува дописникот на МИА од Брисел, Европската комисија бара сите страни во овој судир, што прераснува во целосно ембарго на официјална Приштина за македонските производи и патни такси за Косоварите при влез во Македонија, да се држат до обврските преземени во рамки на Централно-европскиот договор за слободна трговија (ЦЕФТА).
- Ние се стремиме кон појаснување на неодамнешните пријавени мерки и очекуваме сите страни да ги почитуваат своите обврски во рамките на ЦЕФТА – рече портпаролот на Комисијата, Петер Стано.
Дневник вчера јави дека е можно Македонија да воведе визи за Косовците доколку Приштина не го повлече целосното ембарго за македонските производи, од кое земјава трпи огромни штети.