ХРАБРОСТ Е ДА СЕ БИДЕ ЖЕНА ТАКСИСТ ВО ОВОЈ „МАШКИ СВЕТ: Сузана Арсовска е една од ретките жени таксисти во Македонија

Добивај вести на Viber

Сузана Арсовска е една од ретките жени таксисти, не само во Скопје, туку и пошироко низ земјава, а верувајте, храброст е да се биде таксистка во овој „машки свет“. 

Таа е една од оние, знаете, светски жени - со неа разговорите можат да траат со часови и часови, и нема да почувствувате кога летнало времето.

Разни патници, разни судбини и разговори слушнала и слуша со години, како таксистка во Скопје.

- И ден денес знам сама да се насмеам во кола сеќавајќи се на мојата прва година како такси шофер, кога младите излегувајќи од ноќен клуб во вечерните часови знаеле да подвриснат кога ќе ме видат, за потоа така радосни и весели да прават слефи со мене. Сум знаела и да подисплашам некои господа, не очекувајќи жена во тие ноќни часови. Сè на сè многу одобрување, восхит и голема поддршка од сите за ова што го работам. Признавам дека треба голема храброст – треба добро познавање на градот, сообраќајот. Последниве две три години е ужасно низ градов. Во истиот момент треба психолошка проценка дали некој патник да го пуштиш во кола или не. По некогаш се мрзне во автосервиси, по мајстори... Навистина треба силен карактер и цврст дух. Секоја втора патничка што ќе влезе во кола ќе ми признае: „Ах госпоѓо, ова никогаш не би можела да го работам“, оттука и малку жени во оваа професија, вели Арсовска за Женски магазин.