И Србија препорача да не се патува во Ирак, македонското МНР засега молчи

Добивај вести на Viber

Српското Министерство за надворешни работи денеска им препорача на државјаните на Србија да се воздржат од патување во Ирак заради влошената безбедносна ситуација во оваа земја. На граѓаните кои се во можност да го напуштат Ирак им се препорачува тоа веднаш да го направат по консултација со амбасадата на Србија во Багдад, се наведува во соопштението на српското МНР. Притоа се додава дека безбедносната ситуација во Ирак особено е влошена од почетокот на месецот, откако исламските екстремисти ги зазаедоа градот Мосул и покраината Нинева, а не може да се исклучи ниту дека е можно наскоро да се влоши ситуацијата и ви Багдад. Вакви препораки уште од вчера издадоа и повеќето европски земји, меѓу кои и Германија. Македонското МНР засега официјално не испратило предупредување до граѓаните да избегнуваат патување во Ирак. Македонија нема своја амбасада таму, ниту пак прецизни податоци колку Македонци живеат во оваа земја. Најблиска македонска амбасада е онаа во Анкара, Турција. Порано дипломатските односи меѓу Македонија и Ирак беа многу поинтензивни, па дури и македонски градежни компании работеа во оваа земја. По симнувањето на режимот на Садам Хусеин, македонски мировници учествуваа во меѓународната мировна мисија „Слобода за Ирак“ и од 2003 до 2008 година таму испрати вкупно околу 500 војници. Б.А.