Инспекторатот за транспорт одзема осум возила и издаде 18 казни за законски прекршоци

Добивај вести на Viber

Државниот инспекторат за транспорт, во текот на јануари 2013 година извршил 381 инспекциски надзор, по кои издал 18 покани за наплата на глоба и 28 платни налози за лицата кои ги прекршиле законските одредби, поднел 79 барања за поведување прекршочна постапка до надлежните судови, и до надлежната комисија за прекршоци, информираше Министерството за транспорт и врски. Според соопштението од Министерството, заради констатирани нерегуларности, во текот на минатиот месец се одземени осум возила со кои се вршел незаконски јавен превоз на стока и патници без дозвола, односно лиценца. „Државниот инспекторат за транспорт согласно Законот за јавни патишта во континуитет врши инспекциска контрола во однос на изградбата, одржувањето и заштитата на патиштата  и   патниот појас, мостовите, сигнализацијата, опремата  на патиштата и врши проверка на оптоварување на патиштата од возила. Редовно се вршат и акциски контроли согласно Законот за превоз во патниот сообраќај на сите автобуски станици во Република Македонија каде се следи редовноста и уредноста на меѓуопштинските и меѓународните линии како и исполнување на соодветните техничко-експлоатациски услови на возилата со кои се извршува превоз на патници“, се вели во соопштението од Министерството за транспорт и врски. Во него се додава дека во соработка со Царинската управа и Граничната полиција, Државниот инспекторат за транспорт врши контрола на влез и излез на граничните премини и за сите констатирани неправилности ги презема соодветните законски санкции.