Исламската држава е најмоќна терористичка организација – кој ја финансира?

Добивај вести на Viber

Екстремистите на Исламската држава во почетокот за финансирање се потпираа на богати донатори од Персискиот Залив, но сега заработуваат повеќе од три милиони долари на ден преку ѓверц на нафта, трговија со луѓе, кражби и изнуда, тврдат американски разузнавачки извори. Изворите на приходи на оваа екстремистичка организација, која зазема делови од Ирак и Сирија, ги надминуваат ресурсите на која било друга терористичка организација во историјата. Големите приходи на т.н. Исламска држава се една од причините заради кои американските власти се загрижени заради оваа организација, иако засега нема податоци дека таа планира директни напади врз цели во САД. Исламската држава контролира и до 11 нафтени полиња во Сирија и Ирак, велат аналитичарите,а продава нафта и друга стока преку старата шверцерска мрежа во земјите против чии власти се бори - во курдската област во северен Ирак, Турција и Јордан. Американските власти не мислат дека владите на тие земји се вмешани во шверцот, но бараат од нив да работат повеќе за да се спречат овие активности. Исламската држава продава нафта, која ја превезува со цистерни, по снижени цени - за 25 до 60 долари за барел, додека регуларната цена е над 100 долари. Само на овој начин Исламската држава, според некои проценки, заработува над три милиони долари на ден. Оваа организација исто така заработи стотици милиони долари шверцувајќи антиквитети од Ирак во Турција, како и од продажба на жени и деца како сексуални робови. Приходите на ИСИЛ вклучуваат и кражби во градовите што ги зазема, како и откуп за киднапирани лица. „Во активностите за собирање пари потсеќа на мафијашка организација. Добро се организирани, систематични и тоа го спроведуваат со закани и насилство“, вели американски разузнавач. Пред да го заземе ирачкиот град Мосул во јуни, Исламската држава наметна „такса“ за речиси сите економски активности, заканувајќи им се со смрт на сите што не сакаат да платат. Само во Мосул со овие давачки зема осум милиони долари месечно.