ИЗБОРНИТЕ ПРАВИЛА НЕ СЕ МЕНУВААТ НА МУСКУЛИ - партијата на Павле Трајанов бара да се повлечат измените на Изборниот законик

Добивај вести на Viber

Демократскиот сојуз на седницата на собраниската Комисија за политички систем ќе предложи суштински амандмани на предлог измените на Изборниот законик, но сепак, сметаме дека поради монополот што го имаат предлагачите на законот, во парламентот нема услови за коригирање на текстот, поради што бараме да се повлечат измените на Изборниот законик, велат од партијата.

Демократскиот сојуз предлага процентот на потребни потписи од вкупниот број на запишани гласачи како услов за кандидирање независни листи на советници и градоначалници да биде 0,3 отсто, потоа целосно бришење на одредбите за отворени листи и прагот од 3 отсто за пласман во горниот дел на листата, платениот рекламен простор да се дели подеднакво на сите партии, а да се предвиди и време за независни листи и кандидати. Да не се лимитира пристапот до социјалните мрежи и интернет порталите, и целосно да се исфрлат ограничувањата за платено политичко рекламирање.

„Поради сето тоа, Демократскиот сојуз смета дека нема услови за менување на зборните правила непосредно пред изборите, се крши воспоставената пракса и ставот на ОБСЕ/ОДИХР, изборните правила да не се менуваат 6 месеци пред одржување на изборите, не е обезбедена експертска и поширока јавна расправа, пленарната седница во Собранието е закажана 7 минути пред нејзиното одржување, комисиската расправа за поднесување амандмани е закажана за 15 до 30 минути, со што се спречи пратениците да можат да го разгледаат, а уште помалку да ги проучат предложените измени на законскиот текст, не се дозволи дополнително време за поднесување амандмани“, велат од партијата на Павле Трајанов.

Според партијата, изборните правила не се менуваат на „мускули“, со кршење на деловничките правила и преку ноќ. ДС ги повикува сите политички партии да го поддржат овој став, а предлагачите да го повлечат законот од натамошна постапка. Партијата предлага по завршувањето на локалните избори да се донесе целосно нов закон, Македонија да биде една изборна единица, и сите сугестии на партиите, невладиниот сектор, експертите, ОБСЕ/ОДИХР, да се вградат во новиот текст.