Изгласан Закон кој треба да помогне фирмите полесно да ги вратат заостанатите долгови

Добивај вести на Viber

Собраниетo денеска во продолжението на 55. седница го донесе Законот за отпишување на камати на доспеани обврски по основ на придонеси од задолжително социјално осигурување.

Како што посочи заменик-министер за  финансии Ардијан Џеладини предложениот закон ќе овозможи целосно отпишување на каматите за придонесите од задолжително пензиско и инвалидско осигурување кои настанале до 2009 година, ако уплатата на основниот долг се изврши за шест месеци. Со истиот предлог на закон се овозможува и отпишување на камати по основ на долг за сите видови придонеси од социјално осигурување во периодот од 2009 до 2012 година. Според Џеладини, законот дава предвидува можност за стопроцентно отпишување на каматата ако главниот долг се плати во рок од шест месеци од поднесување на барањето, седумдесет и пет проценти отпис од каматата доколку долгот се врати за  12 месеци или пак 50% од каматата да бидат отпишани ако долгот се исплати за 12 до 18 месеци. Целта на оваа мерка на Владата е да им се излезе во пресрет на барањата на стотици македонски фирми кои се однесуваат на заостанати обврски по основ на пензиско и здравствено осигурување. Се проценува дека вредноста на каматите кај долгот по основ на пензиско осигурување изнесува 40 проценти од долгот. Од друга страна пратеникот Изет Зеќири, од НДП  законот го нарече нова популистичка мерка на Владата. Како позитивно тој ја оцени можноста, фирмите да ги отплатат долговите, но од друга страна, вели Зеќири, мерката нема да влијае врз исплатата на долгот. Бизнис секторот, на чело со  извршниот директор на Сојузот на стопански комори,  Митко Алексов, позитивно ја оцени мерката за која смета дека ќе придонесе компаниите полесно и редовно да ги подмируваат обврските.