Израел во Газа за прв пат употреби оружје со вештачка интелигенција
Објавено во: Свет 10 Февруари, 2024
Израелската војска за прв пат распореди воена технологија со вештачка интелигенција во борбите во Газа, што ги зголеми стравувањата од употреба на автономно оружје во модерното војување.
Станува збор за оптички нишан кој користи вештачка интелигенција, а која е создадена од израелскиот стартап „Smart Shooter“. Овој нишан е поврзана со оружје како што се пушки и митралези.
„Тоа им помага на нашите војници да пресретнат беспилотни летала бидејќи Хамас ги користи многу. Секој редовен војник, дури и слеп војник, тој оптички нишан го прави снајперист“, изјави неименуван воен претставник за новинската агенција АФП.
Зголемениот број на цивилни жртви покажува дека е потребен многу поголем надзор над употребата на новите форми на одбранбена технологија, рече Мари Вејрем, заменик-директор на Одделот за оружје во Хјуман рајтс воч.
„Сега се соочуваме со најлошата можна ситуација на смрт и страдање, а дел од тоа е предизвикано од новата технологија“, рече таа.
Интензивните борби меѓу израелските војници и оперативците на Хамас продолжуваат во јужниот, централниот и северниот дел на Појасот Газа. Најмалку 28 цивили загинаа, а десетици се повредени во ноќен напад на израелската армија врз станбени згради во Рафа, според палестинските медиуми, додека градоначалникот Ахмед ел Суфи предупредува дека „секоја воена акција во градот со повеќе од 1,4 милиони ги водат Палестинците во масакр и крвопролевање“.
Претставник на Хамас вели дека разговорите за примирје одржани во Египет биле „позитивни и добри“ и дека се чека одговорот на Израел.