ИЗРАEЛЕЦ КОЈ ПОМИНА 54 ДЕНА ВО ГАЗА: Лекар без анестезија го извади куршумот од мојата нога

Добивај вести на Viber

Израелец кој 54 дена бил заробен во Газа вели дека го оперирале без анестезија. 

Ослободениот израелски заложнил, кого палестинската терористичка група Хамас го киднапираше на музичкиот фестивал „Супернова“ откако беше ранет во ногата, зборуваше за деновите во заробеништво во Газа, откривајќи дека бил опериран без анестезија. На Итај Регев (19) му кажале дека израелската влада не сака да го врати и дека повеќето заложници загинале при напад на израелската армија.

„Тоа беше вистинска психолошка војна со која сакаа да ме натераат да се плашам од нападите на израелската армија повеќе отколку од моите киднапери“, изјави Регев за Гардијан.

Во ноември, привремениот прекин на огнот дозволи ослободување на Регев, неговата сестра Маја и повеќе од 100 други заложници, во замена за 240 Палестинци кои се држат во израелските затвори. Регев рече дека главен приоритет на израелските власти треба да биде враќањето на околу 130-те луѓе кои сè уште се држат како заложници.

„Примирјето нема цел доколку заложниците не се вратат“, рече Регев, чиј пријател Омер Шем-Тов (21) уште е во заробеништво.

Маја Регев, сестрата на Итај и неговиот пријател Омер присуствувале на музичкиот фестивал „Супернова“ на 7 октомври, на помалку од пет километри од границата со Газа, неколку дена по враќањето од одморот во Мексико. Кога слушнале истрели и врисоци, сфатиле дека мораат да бегаат.

Луѓето почнале да паѓаат околу нив. Додека барале засолниште во автомобилот, Хамас испукала истрели, погодувајќи ги и Регев и неговата сестра во ногата.

„Не сфатив дека сум заробен“, рече Регев додека се сеќаваше дека го возеле преку граница. 

Од задниот дел на камионот со врзани раце и опкружен со луѓе од Хамас, тој рече дека можел да ја слушне смеата и овациите на луѓето кои биле воодушевени што терористите ги носат заложниците.

Тие прво биле однесени во куќа и спуштени во тунел пред да бидат однесени во болница,  каде ‘преплашениот’ лекар без анестезија го извадил куршумот од неговата нога. Киднаперите со кои цело време бил опкружен му рекле да молчи или ќе го убијат.

Првата недела ги држеле заробени во заклучена соба од една куќа, лишени од дневна светлина и со малку храна, недоволна за него и за сестра му.

Додека Израел се обидува да ги ослободи останатите заложници заробени од Хамас за време на нападите на 7 октомври во кои загинаа 1.200 луѓе, во израелските воени напади загинаа повеќе од 31.000 луѓе во Газа.

Во израелски оган загинаа шест Палестинци, а десетици други се ранети додека толпи жители чекаа камиони со помош во градот Газа, соопштија претставници на Министерството за здравство на Газа.