Извештајот на СЈО денеска пред собраниска комисија
Објавено во: Македонија 23 Април, 2018
Шестмесечниот извештај на Специјалното јавно обвинителство за периодот од 15 септември до 15 март денеска ќе биде на дневен ред на собраниската Комисија за политички систем и односи меѓу заедниците.
Во извештајот објавен на 15 март се наведува дека во текот на извештајниот период од страна на судот се целосно одобрени 15 обвиненија поднесени во јуни 2017 година.
„Во оваа смисла, петтиот извештаен период несомнено претставува потврда на целокупната работа на тимот на Јавното обвинителство за гонење на кривични дела поврзани и кои произлегуваат од содржината на незаконското следење на комуникациите од неговото започнување со работа и заклучно со поднесувањето на овој Извештај“, пишува во извештајот.
Во текот на петтиот извештаен период, исто така, СЈО отвори седум нови истражни постапки против вкупно 17 лица.