Извозот лани падна за 10,1%, а увозот за 7,1%

Добивај вести на Viber

Вкупната вредност на извезени стоки од Македонија минатата година изнесува 4,0 милјарди долари и е за 10,1% помал, споредено со 2011 година, соопшти Државниот завод за статистика. Во исто време во земјата се увезени стоки во вредност од 6,51 милјарди долари, што е за 7,1% помалку споредено со истиот период претходната година. Трговскиот дефицит минатата година достигна 2,50 милјарди долари, а покриеноста на увозот со извоз е 61,5%. Трговската размена по производи покажува дека во извозот најголемо е учеството на катализаторите на носачи со благородни метали или нивни соединенија, фероникелот, производите од железо и челик (валани производи), облеката и преработките од нафта. При тоа најголем пад на извозот во 2012 година е забележан во челичната индустрија и кај нафтената индустрија. Во увозот најмногу се застапени суровата нафта, платината и легурите на платина, необработени или во прав, моторните возила за превоз на лица и електричната енергија, а најголем пад на вкупната вредност на увозот е забележан кај машини и транспортни уреди и суровини. Во периодот јануари-декември 2012 година, најголемо учество во извозот на стоки имаат земјите-членки на ЕУ 27 (62,8%) и земјите од Западен Балкан (24,4%), а во увозот на стоки најголемо учество имаат земјите-членки на ЕУ 27 (58,4%) и земјите во развој (22,9%). Според вкупниот обем на надворешно-трговската размена, Македонија најмногу тргува со Германија, Грција, Србија, Бугарија и Италија (47,1% од вкупната надворешно- трговска размена се врши со овие пет земји)