Добивај вести на Viber
Со потпишување на меморандум за соработка ќе се зацврстува и интензивира бизнис соработката меѓу стопанствениците на Македонија и Јордан. Денеска членовите на Сојузот на стопански комори, се сретнаа со бизнисмените од Стопанска комора на Јордан по што ги договорија идните чекори за соработка.
„Компаниите од Јордан доаѓаат од повеќе сектори, и главно се заинтересирани за соработка во земјоделството, градежништвото, ИКТ, финансии, туризам, обновливи извори на енергија. За Јорданците особено е интересен ИКТ секторот за кој географската дистанца не претставува никаков проблем, а во делот на градежништвото бизнисмените ги разгледуваат опциите за заеднички настап на трети пазари. Веќе има и конкретен интерес за увоз на вода, сокови и преработки од храна. Ние не сме традиционални трговски партнери, надворешно трговската размена меѓу двете земји е 250-300 илјади американски долари, што е многу малку и треба да се зголеми. Сепак, Македонија има суфицит во извозот со Јордан и околу 50 % од нашиот извоз кон Јордан се делови од автомобилската индустрија “, изјави извршниот директор на ССК, Митко Алексов
Заменик претседателот на Стопанската комора на Јордан, Иса Мусад смета дека има голем потенцијал за соработка меѓу двете земји.
„Јорданските компании имаат интерес за соработка и инвестиции. Во двете земји има компатибилни сектори и се надевам дека ќе имаме почести средби. Имавме можност да ги разгледаме и слободните економски зони и гледаме потенцијал за соработка“, истакна Мусад.
Денешниот бизнис форум во организација на Сојуз на стопански комори, со поддршка на Министерството за надворешни работи и Дирекцијата за ТИРЗ беше одлична можност македонските компании да се запознат со можностите и да работат на придобивање на јорданскиот пазар.