Ќе ги огрее ли сонце 3.000 мали домашни акционери во РЖ Економика? Акционер докупи 20 отсто од акциите на оваа железарска компанија!

Добивај вести на Viber

Над 3.100 мал акционери во РЖ Економика кои се домашни физички лица и поседуваат 29 отсто од акциите во таа компанија, согласно Законот за преземање компании, треба да добијат понуда за откуп на нивните акции. Цената по акција би требало да биде 50 денари затоа што тоа е цената по која таа акција се тргувала цела година наназад

Кавадаречката компанија ГМЛ одлучи во новата година да влезе со значајно вложување во акции на РЖ Економика, една од фирмите кои произлегоа до поделбата на скопскиот социјалистички гигант „Рудници и железарница“.

Кавадаречката компанија ГМЛ кон крајот на декември купи 20 отсто од акциите на РЖ Економика и со тоа стана најголем поединечен акционер во таа железарска компанија. Сега ГМЛ поседува 40 отсто од сите акции во РЖ Економика.

Од официјалната евиденција достапна на веб страницата на Македонската берза евидентно е дека во декември се склучени две трансакции со акциите на РЖ Економика. Притоа се истргувани 107.324 акции со право на глас. Единечната цена за акција изнесува 50 денари, а вкупната сума за истргуваните акции изнесува безмалку 90.000 евра. Сите акции во двете трансакции ги купил ГМЛ од Кавадарци.

Цената по која е тргувана акцијата е идентична со цената по која таа акција се тргувала цела година наназад. Факт е дека таа акција не е меѓу најатрактивните на Македонската берза и дека се тргува ретко. Факт е дека оваа компанија не дели дивиденда, но и дека работата не и оди најдобро во последните три години од аспект на профитабилност. Приходот од продажба лани изнесувал над 300.000 евра, а добивката била само 10.000 евра. Оваа компанија не делела дивиденда во последните три години, а во претпоследните две години работела со загуба.

Книговодствената вредност на акцијата изнесува 320 денари, но нејзината пазарна вредност не надминала 50 денари за акција. Оваа скопска компанија претежно се занимава со трговија на големо и на мало со резервни делови. Освен тоа издава и сопствен деловен простор, а работи и сметководствено-финансиски консалтинг.

Од акционерската структура е видливо дека од почетокот на годинава меѓу поголемите поединечно акционери го нема домашното физичко лице Ванчо Ангелов кој претходно поседуваше 14 отсто акции во компанијата.

Според акционерската книга РЖ Економика освен ГМЛ има уште два големи поединечни акционери. Втор по голема, по ГМЛ, е скопскиот челичарски гигант „Макстил“ кој поседува 20,1 отсто од акциите, а трет најголем поединечен акционер е Фирст Поинт МН од Скопје. Оваа фирма поседува 8 отсто од акциите во РЖ Економика.

ГМЛ од Кавадарци не е компанија што е широко позната во македонската јавност, но во стручната фела од која доаѓа е позната како една од најдобрите македонски компании специјализирани за изработка на бигувани мрежи и плетени сита за потребите на каменоломите во Македонија.

Што ќе донесе оваа промена за повеќе од 3.000 мали акционери – домашни физички лица? Согласно Законот за преземање компании секој акционер што ќе оформи пакет во кој има над 25 отсто од сите акции со право на глас треба да поднесе јавна понуда за откуп на сите слободни акции.

Ако биде така цената за акција нема да биде повисока од 50 денари затоа што тоа е цена по која таа акција се тргувала цела година наназад.

Н.С.