Ќе купуваме „тајно“ оружје од САД

Добивај вести на Viber

Министерството за одбрана до Владата на САД доставило шест писма со барања преку кои се бара да се реализира набавка на воена опрема.

Ова го потврди заменик-министерката за одбрана, Елфет Исмаили на денешната седница на собраниската Комисија за одбрана и безбедност.

- Материјалот има за цел да ја информира Комисијата за одбрана и безбедност на Собранието за потребата од набавување на воена опрема од Владата на САД преку прифаќање на писма на понуди. Фактички, Министерството за одбрана ја разгледа потребата за реформи во одбранбениот сектор. Со долгорочниот план за одбрана се трасира патот на реформите за одбрана и се нуди рамка за модернизација и опремување на Армијата на Република Северна Македонија за достигнување на една целосна усогласеност со членките партнери на НАТО, рече Исмаили.

Пратеникот Павле Арсоски како претседателот на Комисијата за одбрана и безбедност, ги извести членовите дека материјалот е со ознака „за ограничена употреба“ и дека седницата ќе се одржува зад затворени врати.

-Ова значи материјалот не е со степен на квалификација, но истиот не е дозволен за пристап и потребно е да се запази принципот - потребно е да знае согласно Законот за квалифицирани информации и Уредбата за административни работи на безбедносни квалифицирани информации и информации со ограничена употреба. Од тие причини, по излагањето на заменик-министерката за одбрана ќе ја затвориме Комисијата во тој дел и ќе продолжиме со прашања и коментари од страна на членовите на Комисијата, рече Арсоски.