Ќе се види ли денес прагматизмот и реализмот на Коѕијас во Охрид?
Објавено во: Македонија 12 Април, 2018
Откако вчера во Охрид на аеродромот Апостол Павле слета грчкиот министер за надворешни работи Никос Коѕијас, денес се очекува целосна и детална средба со неговиот македонски колега Никола Димитров, при што ќе се разговара детално за следните чекори во изнаоѓање на решение околу спорот за името. Досега македонската страна прикажа највисоко ниво на конструктивност и посветеност и таквите заложби се јасно детектирани од меѓународните партнери кои се надеваат дека решение ќе има по што Македонија ќе може да го продолжи својот пат кон НАТО и Европската Унија.
Добар знак е и тоа што министерот Коѕијас драстично ја промени својата реторика во медиумите и во пресрет на средбата во Охрид, од неговата посета на Белград даде многу „прибрана“ изјава во која посочи дека прагматизмот и реализмот се клуч во наоѓање на решение.
Истото го следи и грчкиот владин портпарол Ѕанакопулос кој изјави дека во преговорите се уште треба да се покријат многу работи, но ниту еднаш не спомена дека Грција останува на барањата за уставни промени во Македонија со цел да се гарантира евентуално постигнатиот договор, сметајќи дека сега постои политичка волја и голем капацитет да се најде решение на спорот за името.
Шефот на македонската дипломатија Никола Димитров и неговиот грчки колега Никос Коѕијас денеска во Охрид ќе имаат средба како дел од најновата рунда преговори за надминување на проблемот што Грција го има со уставното име на Република Македонија.
– Се надевам на прогрес и мислам дека однесувањето на Грција и Македонија во однос на процесот сигнализира дека процесот е во деликатна фаза и фокусирани сме токму на овие разговори. Се надевам дека ќе ни помогне што оваа рунда се одржува во Охрид, изјави Димитров пред средбата со Коѕијас.
Шефот на грчката дипломатија вчера во Белград пред да отпатува за Охрид рече дека дека е направен чекор напред во решавање на спорот за името и оти за негово затворање е потребен компромис.