КОМПАНИЈА НУДИ 75.000 ДОЛАРИ НА ВРАБОТЕНИТЕ ЗА ДА ИМААТ ДЕЦА: Jужна Кореја презема мерки против стареењето на населението
Објавено во: Свет 27 Февруари, 2024
Компании во Јужна Кореја им нудат на вработените илјадници долари за да имаат деца. Населението во државата старее.
Една јужнокорејска компанија им нуди на вработените до 75.000 долари за да имаат деца, пренесува Н1. Компанијата за долна облека „Сангбангвол“ минатата недела објави дека на работниците ќе им даде бонуси од 22.400 долари за првото дете, уште 22.400 долари за второто и 30.000 долари за третото дете.
„Нискиот наталитет е важна задача која нашето општество треба да ја надмине. Компанијата ќе преземе одговорност и ќе вложи максимални напори да ѝ помогне на земјата да го зголеми наталитетот“, рече портпаролот на компанијата.
Претходно, градежната компанија „Бојунг груп“ со седиште во Сеул, објави дека ќе додели бонус од 75.000 долари по дете на вработените кои имаат бебиња. Истата компанија го прошири бонусот за вработените кои имале деца од 2021 година. Вработените во компанијата имале вкупно 70 деца од 2021 година, така што компанијата е подготвена да плати 5.25 милиони долари во готово на своите работници. Бонус можат да добијат и мажите и жените.