Kрај на трговската војна меѓу Македонија и Косово?

Добивај вести на Viber

Косовската влада по одлуката на македонската влада за укинување на условенниот увоз на брашно, најави кревање на рампата за македонските производи и повлекување на ембаргото. Од кабинетот на косовскиот вицепремиер, Хајредин Кучи велат дека утре ембаргото ќе биде тргнато. „Границата ќе се деблокира во сабота навечер“, соопшти Дритон Лајци од кабинетот на вицепремиерот на Косово, Хајредин Кучи, а пренесе НОВА. Како што вечерва одлучи македонската Владата,  мерката за условен увоз на брашно од странство во земјава ќе престане да важи на 15 септември на полноќ, соопшти вицепремиерот за економски прашања Владимир Пешевски. Тој истакна дека за укинувањето веднаш била информирана владата на Косово. „Има најави од косовските медиуми дека ќе биде укината и нивната мерка за забрана на увоз на македонски производи. Сепак за тоа останува да одлучи Косовската влада“, изјави Пешевски. Мерката за условен увоз на брашно беше повод Косово да воведе ембарго на дел од македонските производи, а по контра мерките и воведувањето такси за влез во Македонија на косовските жители, и целосно да го забрани увозот во Косово од Македонија. Владата ја укина мерката за условен увоз на брашно по направената проценка дека пазарот со брашно е стабилизиран и не постои опасност од загрозување на домашното производство. Како што претходно изјави вицепремиерот Пешевски, штом Косово го тргне ембаргото за македонски производи, по автоматизам се укинуваат и влезните такси за косовските државјавани во земјава.