Левица: Власта сака да им ја зголеми платата на административците за 170 евра
Објавено во: Македонија 27 Септември, 2022
Левица денеска излезе со реакција дека власта со новиот предлог – Закон за административни службеници предлага линеарно покачување на платите на административните службеници, кои работат во Министерство или Секретаријат, за околу 170 евра нето плата по вработен.
„Со овој предлог закон (со сегашната вредност на бод), власта во најголемата економска криза, ќе треба да обезбеди за административците во министерствата и секретаријатите дополнителни минимум 50 милиони евра годишно во буџетот, за исплата на повисоки нето плати, придонеси и данок на личен доход“, соопштија од Левица.
Ова за Левица претставува оптоварување за државниот буџет, каде јавниот долг ја надминал критичната линија од 60 отсто од БДП.
„Наместо соодветни редистрибутивни мерки од најбогатиот слој кон загрозените групи граѓани, оваа криминална Влада без визија, стратегија и компетентност единствено нуди изговори за “увезена криза”, додека секојдневно ги зголемува непродуктивните трошења за лукративни цели.
Средствата кои треба да се обезбедат ќе паднат на товар на осиромашениот работник и со тоа Владата, место да воведе антикризни мерки, ќе ја продлабочи економската криза, која веќе е излезена од контрола“, реагира партијата.