Лукоил ја потврди зделката на годината: Се појавија нови детали за интересната историја на дискретниот милијардерски купувач на нафтената компанија

Добивај вести на Viber

Веста дека руската нафтена компанија Лукоил ја прифатила понудата на глобалниот енергетски трговец Гунвор за купување на нејзините странски подружници сè уште привлекува внимание низ целиот свет. Оваа одлука, да потсетиме, доаѓа само една недела откако САД воведоа санкции врз Лукоил поради војната во Украина.

„Клучните услови на трансакцијата беа претходно договорени. Лукоил ја прифати понудата на Гунвор и се обврза да не преговара со други потенцијални купувачи“, се вели во соопштението на руската компанија. Гунвор, исто така, потврди дека се во преговори за преземање на странските средства на Лукоил, пишува српски Блиц.

Лиценцата на САД дозволува трансакцијата да биде завршена до 21 ноември

Според Министерството за финансии на САД, на компаниите им е издадена привремена лиценца што им овозможува да го завршат својот постоечки бизнис со Лукоил и Роснефт, друга руска енергетска фирма која е опфатена со новите санкции, до 21 ноември.

Доколку е потребно, Лукоил и Гунвор ќе побараат продолжување на лиценцата, а целиот договор мора да биде одобрен од Канцеларијата за контрола на странски средства (OFAC) на Министерството за финансии на САД.

Гунвор - од руски трговец со нафта до зелена енергија

Групацијата Гунвор некогаш беше најголемиот трговец со руска нафта во светот, а беше основана на почетокот на 2000-тите од шведскиот бизнисмен Торбјорн Торнквист и рускиот милијардер Генадиј Тимченко, близок сојузник на Владимир Путин.

Откако САД воведоа санкции врз Тимченко во 2014 година поради анексијата на Крим, Торнквист го откупи својот удел и стана мнозински сопственик на компанијата, што му овозможи на Гунвор да ги избегне санкциите на САД. Денес, тој контролира повеќе од 80% од сопственоста и ја води компанијата од седиштето во Женева.

„Гунвор“ работи во повеќе од 100 земји низ целиот свет, се занимава со трговија, транспорт, складирање и преработка на нафта и гас, а во последните години интензивно инвестира во зелена енергија, ветерни фарми и обновливи извори.

Според „Форбс“, богатството на Тернквист се мери во милијарди долари, а во деловните кругови е опишан како дискретен, прагматичен и методичен преговарач. Надвор од деловниот свет, тој е познат како страствен морнар и сопственик на тимот „Артемис Рејсинг“, учесник во престижното натпреварување „Америкас куп“.

Што продава „Лукоил“?

Доколку се реализира договорот, „Гунвор“ би можел да го преземе најважниот странски проект на „Лукоил“ – нафтеното поле „Вест Курна 2“ во Ирак, едно од најголемите во светот, каде што руската компанија има 75% удел.

Според агенцијата Интерфакс, тоа поле произведувало повеќе од 480.000 барели нафта дневно во април.

Во Европа, Лукоил поседува:

- рафинеријата „Нефтохим Бургас“ во Бугарија (капацитет 190.000 барели дневно), најголемата на Балканот,

- рафинеријата „Петротел“ во Романија,

- снабдување на пазарите во Словачка, Турција и Унгарија,

- мрежи на бензински пумпи и терминали низ цела Европа,

- како и проекти во Централна Азија, Африка и Латинска Америка.