Министерството за правда се повлекува: „Негативното мислење“ нема да биде навреда
Објавено во: Македонија 06 Февруари, 2022
Министерството за правда излезе во јавноста со соопштение дека „негативно мислење“ е погрешна формулација во предложениот закон за граѓанска одговорност. Откако законот влезе во собраниска процедура, јавноста реагираше дека ова можеби значи дека спротивставено мислење или критика може да се толкува како навреда и да се осуди.
- Министерството за правда ја информира јавноста дека формулацијата во однос на предлог Законот за граѓанска одговорност каде за навреда се одговара и за „негативно мислење“, е грешна формулација за што ќе се интервенира веднаш во амандманската расправа. Министерството за правда целосно ги поддржува новинарски слободи и права и сите закони ги носи заедно со здруженијата, а во интерес на објективното и слободното информирање, објави денеска министерството.
Предлог законот за граѓанска одговорност за навреда и клевета којшто го предлага Владата, преку Министерството за правда, а деновиве влезе во собраниска процедура предвидува за навреда и клевета да се одговара и за објавување на негативно мислење.
– За навреда одговара тој што за друго лице со утврден или очевиден идентитет, со намера да наштети на неговата чест и углед, со изјава, содржина, однесување, објавување или на друг начин ќе изрази омаловажувачко, понижувачко или негативно мислење, стои во спорниот став од членот 6 во Законот.