МИНИСТРИТЕ И ФУНКЦИОНЕРИТЕ НА ДУИ ПОДНЕСОА ОСТАВКИ: Лидерот Ахмети во отворено писмо го информираше премиерот Ковачевски

Добивај вести на Viber

Сите министри и владини функционери на ДУИ денеска поднесоа оставки од нивните позиции, за што пред еден час лидерот Али Ахмети на Фејсбук објави што му напишал на премиерот Димитар Ковачевски.

Ахмети во писмото пишува дека земјава се наоѓа во критична фаза за нејзината европска иднина, па преземајќи ја одговорноста како политичка партија со оглед на условот од опозициската ВМРО-ДПМНЕ дека ќе поддржи уставни измени доколку има влада без ДУИ, тие се решиле на ваков чекор.

Признавајќи дека нашата земја, Република Северна Македонија, е во критична фаза од нашата европска иднина, носејќи ја тежината на интеграцијата како политичка организација во последните 20 години, признавајќи дека големите одлуки бараат политичка, национална и државна одговорност и жртви од секој од нас, почнувајќи од ставот на опозицијата дека би гласале за уставните измени доколку Демократската унија за интеграција излезе од Владата, кои се легитимно избрани по волја на албанскиот гласач, свесни за надежите и сонот на луѓето да станат дел од големото европско семејство, бидејќи јас и Демократската унија за интеграција остануваме посветени на утврдувањето на евроатлантските интеграции, со целосни државни права, покрај НАТО, и Европската Унија, како и нераскинливиот сојуз со Соединетите Американски Држави, се, и остануваат наш најголем интерес на сите наши граѓани, без разлика на нивната национална и верска припадност, министрите и владините функционери од редовите на Демократската унија за интеграција поднесоа оставки од функциите што во моментов ги извршуваат! Оставките господине премиере, автоматски се стапуваат во сила кога опозицијата ќе гласа за уставните измени, пишува Ахмети во писмото.

Влада без ДУИ беше едно од барањата кои лидерот на ВМРО-ДПМНЕ Христијан Мицкоски ги постави на лидерската средба со премиерот Димитар Ковачевски на 7 јуни, а на која се зборуваше за гласање на уставните измени. Уште истиот ден, портпаролот на ДУИ и министер за надворешни работи Бујар Османи соопшти дека тој и неговите сопартијци се спремни на ваков чекор.