МИСТЕРИОЗНА СТРЕПТОКОКНА ИНФЕКЦИЈА СЕ ШИРИ НИЗ ЈАПОНИЈА: Ги погодува младите луѓе, а нејзината смртност е дури 30 проценти
Објавено во: Свет 15 Март, 2024
Во Јапонија, бактериската инфекција која предизвикува таканаречен стрептококен токсичен шок се шири со рекордна брзина, со стапка на смртност до 30 проценти. Надлежните засега безуспешно се обидуваат да ја откријат причината.
Гардијан пишува дека бројот на потврдени случаи годинава сигурно ќе го надмине ланскиот. Минатата година се регистрирани 941 случај, а само во првите два месеци од 2024 година 378. Инфекции се потврдени во дури 45 од 47 јапонски префектури.
Инфекцијата предизвикува висока смртност кај оние помлади од 50 години. Од 65 лица помлади од 50 години на кои им била дијагностицирана т.н. СТСС во периодот од јули до декември минатата година - 21 починале.
Повеќето случаи се предизвикани од бактерија наречена streptococcus pyogenes. Предизвикува болки во грлото, но во некои случаи може да доведе до здравствени компликации и смрт.
Експертите веруваат дека наглото зголемување на случаите е поврзано со укинувањето на ограничувањата наметнати за време на пандемијата на коронавирус.
„Имунолошкиот статус на луѓето по закрепнувањето од Ковид-19 може да ја промени нивната чувствителност на некои микроорганизми. Мораме да го разјасниме инфективниот циклус на тешките инвазивни стрептококни пиогени болести и веднаш да ги ставиме под контрола“, вели Кен Кикучи, имунолог на Женскиот медицински универзитет во Токио, кој вели дека е загрижен поради драматичното зголемување на бројот на пациенти со тешки инвазивни стрептококни инфекции.