Мизо:Неколку компании се пред одлука за инвестирање во Македонија

Добивај вести на Viber

Претставници на неколку меѓународни компании во наредните две до три недели ќе ја посетат Македонија на поконкретни разговори пред да донесат конечна одлука за инвестирање.

„До средината на март очекуваме поконкретни средби со компании кои се пред донесување одлука за инвестирање во Македонија. Станува збор за компании од автомобилската индустрија, електрониката, чевларската индустрија од Америка, Западна Европа,Турција и Јапонија“, изјави за МИА директорот на Дирекцијата за Технолошко-индустриски развојни зони Виктор Мизо.

Владин тим предводен од вицепремиерот и министер за финансии Зоран Ставрески минатата недела ги претстави можностите за инвестирање пред бизнис секторот во Украина, која годинава е прва дестинација каде Владата прави економска презентација.

Директорот Мизо, кој беше дел од делегацијата, истакна дека можностите се претставени пред 200 компании, а интерес поконкретен пројавиле компании од областа на туризмот, експлоатација на минерални суровини, градежништвото, машинското производство, како и извозот на земјоделски производи.

Во делот на туризмот, покрај изградба на хотели, истакнато е и организирање групи од Украина во Македонија, што веќе работи една група, а се очекува да се раздвижи и најновата мерка за субвенции со што Македонија ќе стане поконкурентна дестинација за тамошните туроператори.

Покрај Киев, владината делегација ги посети и Дњепропетровск и Доњецк, кои се индустриски најразвиени региони во Украина. Меѓу најавените дестинации каде Владата ќе ги презентира можностите за инвестирање во Македонија е Јужна Америка.