Млади претприемачи ќе се натпреваруваат со бизнис план – наградата е 15.000 евра

Добивај вести на Viber

Четириесет млади претприемачи в сабота ќе се натпреваруваат за титулата најдобра студентска компанија во бизнис план натпреварот „Брилијантни млади претприемачи” (Brilliant Young Entrepreneurs). JA-YE Europe и Хјундаи Europe во партнерство со “Економско образование на млади менаџери” -Junior Achievement – Македонија и Кореа Ауто Трејд , како овластен дистрибутер на Хјундаи за Македонија, веќе втора година го спроведуваат овој проект кој ќе им помогне на младите од Македонија да ги претворат своите бизнис идеи во реалност и да освојат награда од 15.000 евра. Покрај паричната награда победничкиот тим ќе добие и консултантски услуги од страна на економски експерти. На претприемништвото најчесто се гледа како на едно од најважните решенија за невработеноста, сиромаштијата и нискиот економски раст. Младите се голем и значаен дел од популацијата, но нивниот претприемачки потенцијал е еден од  најнеискористените ресурси за креирање на нови работни места во Република Македонија. Со цел да се искористат нивните креативни и иновативни капацитети и да им се олесни пристапот до финансии, сметаме дека една ваква иницијатива е одлична можност за младите претприемачи да започнат сопствен бизнис и уште од рана возраст да создадат платформа за успешен бизнис, велат организторите на натпреварот. Тимовите ќе се претстават со бизнис планови од најразлични области: софтверска платформа за мали претпријатија; мобилна апликација за туристи; закажување услуги преку мобилен телефон; мултимедијален музичко- училиштен центар; сервис за перење алишта наменет за студенти; пакување и продажба на свежи салати; едукативни игри за деца; маркетинг агенција за мали претпријатија со користење на техниката “тропни на врата”; рекламни панели кои имаат интегриран дисплеј кој реагира на допир,  движење, контакт со очи и говорна команда; мобилна апликација за таблети и паметни телефони со која ќе се овозможи виртуелен 3Д приказ и презентација на производи со помош на технологијата на надополнета реалност; веб портал за самовработување, пракса и соработка помеѓу индивидуи, студенти и компании.